સખી! હું શોધ્યા કરતો'તો મારો આકાર - ઘનશ્યામ ઠક્કર

છંદ : કટાવ

સખી! હું શોધ્યા કરતો'તો મારો આકાર
અરીસાની સરહદની પાર!

અરીસામાં મારું પ્રતિબિંબ
કાચની ઝીણી-તીણી કરચો વચ્ચે
અણુબૉમ્બની અસર તળેના હિરોશિમા-શું ...
જાય વિલાતું.
પળમાં મારો પડછાયા જેવો
આછો
લાંબો-ટૂંકો
ચપ્પટ-બૂઠો
આભાસ
બતાવી જાય.

સતત ડહોળાતાં પાણી
મુજ રૂપ તણા અનુવાદ મહીં
વે...ર...ણ...છે...ર...ણ.....
બેડોળ અનર્થ ઉમેરે!

સખી! હું શોધ્યા કરતો'તો મારો આકાર
અરીસાની સરહદની પાર!

પ્રિયે!
પારદર્શક મુજ દ્રષ્ટિ તણી સપાટીની પાછળ
તુજ સેંથીના સિંદૂર તણો જ્યાં લેપ થયો
ને બન્યો અરીસો

ત્યાં મેં પહેલી વાર નિહાળ્યો સાચો મુજ આકાર!

------------------------

1977

Happy Valentine's Day