આસોપાલવની ડાળે કોયલડી બોલી ત્યારે, શમણાંને સાટે દલડાં વ્હોરીયાં.

ઊંચે રે ટીંબે મારા વાલમનાં ખોરડાં, ખડતલ છે ઢોલિયા ને આથમતા ઓરડા,

આ ઘરથી પેલે ઘર છે વાડ્યો ગુલાબની ને, મારા તો ચોળી-ચણિયા નવા-રે-નકોરડા!

નફ્ફટ કાંટાએ મારી લાજલડી ખોલી ત્યારે, શમણાંને સાટે દલડાં વ્હોરીયાં.

આસોપાલવની ડાળે કોયલડી બોલી ત્યારે, શમણાંને સાટે દલડાં વ્હોરીયાં.

ફૂલો જો લાવશો તો અવળું કૈં બોલશું, કાંટા લૈ આવશો તો દરવાજા ખોલશું,

ભરરે બજાર સોનલ! લાજશરમ છોડી દૈને, ફૂલોની ભારોભાર કાંટાને ટોળશું.

'ઘનશ્યામે' શૂળ લવંડર શાહીમાં બોળી ત્યારે,  શમણાંને સાટે દલડાં વ્હોરીયાં.

આસોપાલવની ડાળે કોયલડી બોલી ત્યારે, શમણાંને સાટે દલડાં વ્હોરીયાં