વાડાની વેલને

ગીત

રાજેન્દ્ર શાહ

વાડાની વેલને વાયરો અડ્યોને લહું લીલી કુંપળની લાલી,

એના અબોલ અણસારે ગુંજાર કાંઈ કેટલો, ખૂણો ન કોઈ ખાલી.

આંહિના તે નાના અંકાશમહીં લાગતું કે

જાણે સવાર નવું ઊગ્યું,

ઠારનાં ઠરેલ જરા જેવડાં આ ઝાકળને નીર

નૂર વ્હાલભર્યું ઝૂક્યું;

આખા મલકનેય અવસર મળ્યો ને રંગમેળાની ભીડ રહી મહાલી

વાડાની વેલને વાયરો અડ્યોને લહું લીલી કુંપળની લાલી.

-

કોરે રહીને કાંઈ જોયું ન જાય

અહિં ઊમટ્યાં બધાંથી ભલી ભેળી,

જંતરને બોલ ઘેલું હૈયું હિલ્લોળ લેતું

ઘૂમે રે સાનભાન મેલી;

અંગનો ઉમંગ રમે ચરણોની ઠેકમાં ને ઠમકે દઈ હાથની તાલીઃ

વાડાની વેલને વાયરો અડ્યોને લહું લીલી કુંપળની લાલી.